Ашшӗ-амашӗ ачине санаторирен илсе кайма пырсан пӑтӑрмах сиксе тухнӑ. Вӗсем ачан телефонне туртса илнӗ. Куншӑн вара лешӗ питӗ кӳреннӗ те вӑрмана тарнӑ.
Ку ӗнер Улатӑр округӗнче пулнӑ. Ашшӗ-амӑшӗ кун пирки тӳрех полицие пӗлтернӗ. Полицейскисем санатори таврашӗнчи вӑрманта ачана шырама пуҫланӑ.
Юрать-ха, арҫын ачана санатори водителӗ, ӗҫе кайма тухнӑскер, асӑрханӑ. Ача 1,5 ҫухрӑм аякка кайма ӗлкӗрнӗ иккен. Кун хыҫҫӑн Канашри ҫемьепе полицейскисем калаҫу ирттернӗ, вара вӗсем чиперех киле кайнӑ.
Улатӑр округӗнчи Алтышевӑри 80-ри кинемей ҫухални пирки ӗнер кӑна пӗлтернӗччӗ. Ӑна икӗ кун вӑрманта ҫухалса ҫӳренӗ хыҫҫӑн, телее, тупнӑ, вӑл чӗрӗ-сывах.
Аса илтерер: кинемей авӑнӑн 7-мӗшӗнче вӑрмана кӑмпана кайнӑ та киле таврӑнман. Ӑна тӳрех полицейскисем, «Лиза Алерт» нимеҫисем шырама пуҫланӑ, вӑрманта сасӑ тата ҫутӑ сигналӗсем панӑ.
Кинемее ҫав кунах тупайман. Ӗнер ӑна хӑйӗн килӗнчен темиҫе километрта асӑрханӑ. Ватӑскер ҫухалса ҫӳресен те кӑмпапа туп-тулли карҫинккине аллинчен яман, пӗрлех йӑтса ҫӳренӗ. Ӑна тухтӑрсен пулӑшӑвӗ кирлӗ пулман, ҫавна май тӳрех киле ӑсатнӑ.
Улатӑр округӗнче 80 ҫулти хӗрарӑма шыраҫҫӗ. Вӑл вӑрмана кайсан ҫухалнӑ.
Раиса Семеновна Маштанова Алтышево ялӗнчен. Вӑл авӑн уйӑхӗн 5-мӗшӗнче вӑрмана кайнӑ та киле таврӑнман. Ӑна халӗ «Лиза Алерт» нимеҫисем шыраҫҫӗ. Ун пирки мӗн те пулин пӗлекенсене ҫак номерсемпе шӑнкӑравласа пӗлтерме ыйтаҫҫӗ: 8 800 700-54-52 (Раҫҫейре тӳлевсӗр), Тучка (Дарья) — 89176602633, Симба (Наталия) — 89196666680.
Кинемей мӗнлерех пулнине санӳкерчӗкре курма пулать. Вӑл килтен кайнӑ чухне мӗн тӑхӑнни паллӑ мар.
Улатӑр округӗнче пурӑнакан Виктор тата Зоя Арефьевсем пӗрлешнӗренпе 60 ҫул иртнӗ. Вӗсен юрату историйӗ 1965 ҫулта пуҫланнӑ. Виктор Ҫурҫӗр флотӗнче ҫарта пулнӑ хыҫҫӑн таврӑннӑ кӑна – Зойӑна курнӑ. Ҫавӑнтанпа вӗсем пӗр-пӗрне килӗштернӗ.
Виктор Михайлович «Электравтомат» савутра ӗҫлесе ӗмӗрне ирттернӗ, Зоя Михайловна вара музыка инструменчӗсен савутӗнче тӑрӑшнӑ.
Халӗ Арефьевсен 3 мӑнук, 3 кӗҫӗн мӑнук тата вӗсен 2 ачи.
Улатӑр округӗнче 37 ҫулти арҫын пушарта вилнӗ. Ку инкек паян ҫӗрле Киря поселокӗнче Пушкин урмӗнче пулнӑ.
Ҫӑлавҫӑсем 126 тӑваткал метр лаптӑк ҫинче алхаснӑ пушара сӳнтерсен 37 ҫулти арҫын виллине тупнӑ.
Палӑртса хӑварар: ҫулталӑк пуҫланнӑранпа республикӑра 803 пушар пулнӑ. Вӗсенче 31 ҫыннӑн пурнӑҫӗ татӑлнӑ. 42 ҫын вара аманнӑ.
Улатӑр округӗнче пурӑнакан Илюшинсем пӗр-пӗрне ӑнланса пурӑнаҫҫӗ. Вӗсем пӗрлешнӗренпе нумаях пулмасть 50 ҫул ҫитнӗ.
Ҫак тапхӑрта вӗсем ҫирӗп ҫемье йӗркеленӗ, икӗ ывӑл ӳстернӗ, халӗ вӗсен 3 мӑнук. Вӗсен йышӗнче спортсменсем те, ӳнерҫӗсем те пур.
Александр Алексеевич та, Людмила Александровна та чукун ҫул ҫинче ӗҫленӗ, пӗр-пӗрне пулӑшса пынӑ.
Улатӑр районӗнче пурӑнакансене шывпа тивӗҫтерме Чӑваш Ен хыснинчен 3,2 миллион тенке укҫа уйӑрса панӑ. Кӗмӗле резерв фондӗнчен уйӑрма йышӑннӑ.
Укҫана уйӑрса парасси ҫинчен калакан документа республикӑн Министрсен Кабинечӗн ертӳҫи Сергей Артамонов алӑ пуснӑ.
Стемас яле патӗнче Сӑр юханшывӗнче шыв шайӗ чакнине пула инкеклӗ лару-тӑру сиксе тухма пултарнӑ. Резерв фондӗнчен уйӑрнӑ уксана шыва уҫласа илме икӗ насус туянма, хӑйӑр насуссне экскаватор-амфибипе тасатма усӑ курӗс. Унсӑр пуҫне укҫа ятарлӑ техникӑна арендӑна илсе вырӑна илсе ҫитернишӗн тӳлеме кайӗ.
Ӗнер, утӑ уйӑхӗн 12-мӗшӗнче, Улатӑр округӗнче ҫын путса вилнӗ.
27 ҫулти арҫын Стемас сали ҫывӑхӗнчи пӗвере шыва кӗнӗ чухне шыв тӗпне анса кайнӑ. Палӑртмалла: унта шыва кӗмелли вырӑн пулман.
Аса илтерер: ҫав кунах Шупашкарта икӗ арҫын Атӑлта путса вилнӗ. Иккӗшӗ те - ют ҫӗршывран килнӗскерсем, Суданра ҫуралнӑскерсем. Вӗсем Мускав ҫыран хӗрринче юраман вырӑнта шыва кӗнӗ. Вӗсен виллисене водолазсем шыраса тупса ҫыран хӗррине илсе тухнӑ.
Улатӑр округӗн хисеплӗ гражданинӗ Мария Чеписова ҫак кунсенче 100 ҫул тултарнӑ.
Тӑван ҫӗршывӑн Аслӑ вӑрҫи пуҫланнӑ чухне вӑл 16-ра пулнӑ, алла катмакпа кӗреҫе тытса Сӑр ҫывӑхӗнче аслисемпе тан окоп чавнӑ.
«Нимӗҫсем килесрен хӑрушӑччӗ, ҫавӑнпа сывлӑш ҫавӑрса илмесӗр ӗҫленӗ. Унта пӗтӗм класӗпе ӗҫленӗ эпир, шӑнса та хытнӑ, апат та ҫиес килнӗ, анчах аттесем фронтра пулнине, вӗсене пулӑшмаллине ӑнланнӑ», - ҫапла аса илет ҫав вӑхӑта пӗр ӗмӗре парӑнтарнӑ кинемей.
Вӑрҫӑ хыҫҫӑн Мария Чеписова райздравра акушерство енӗпе инструкторта ӗҫленӗ. Кайран санэпидемстанцире 38 ҫул вӑй хунӑ.
Ҫемье тата юратупа шанчӑклӑх кунӗ умӗн республикӑри 50 ҫултан кая мар пӗрле пурӑнакан мӑшӑрсене чысласси йӑлара. Кӑҫал 7 мӑшӑра «Юратупа шанчӑклӑхшӑн» орденне парӗҫ.
Ҫак йышра — Красноармейски округӗнчи Геннадипе Галина Ивановсем тата Владимирпа Галина Филипповсем, Куславкка тӑрӑхӗнчи Евграфипе Людмила Ивановсем, Пӑрачкав округӗнчи Владимирпа Валентина Кулясовсем, Улатӑр округӗнчи Александрпа Лидия Маланьинсем, Елчӗк тӑрӑхӗнчи Петрпа Зоя Поповсем, Хӗрлӗ Чутай округӗнчи Геннадипе Нина Ухлиновсем.
Ҫавӑн пекех 5 ача ҫуратнӑ икӗ хӗрарӑма амӑшӗн мухтавӗн «Анне» паллине чыслӗҫ. Ӑна Хӗрлӗ Чутай округӗнчи Эльвира Платонова тата Куславкка тӑрӑхӗнчи Екатерина Шильгачева тивӗҫнӗ.
-9.7 °C